غياب

شف للغلا شي قبل تطول غربتنا

اخاف كثر الغياب وتصعب الجية

بالله في البعد قلي وش حاجاتنا

مدام خدنا الزعل حاجة طفولية

نبغي نموت في بعض مدام ما متنا

يازين خلي الامور تصير عفوية

لا تفرح الحاسدين بطول صدتنا 

لا تنزع القلب وتقطع مجاريه

الارض سكة تعدتها مساحتنا

جيش من الحب خياله ورجاليه

اعشوش القلب وامطر من صراحتنا

واحبال الاشواق معقودة ومطوية

لو افترقنا يا عمري ويش حجتنا

واحنا نشوف الجفا بانت موانيه

الله يوم النجوم تنام ما بتنا

الطرف شاقي وطرف زايد غيه 

على بعضينا اذا كفينا تلفتنا

وكلن يغير من اللفهة طواريه

وان كان نيتك تقطع في علاقتنا

ما عاد عندك يا شيخ الغيد حنية

مرخوص بس خلنا نحفظ كرامتنا

قدامهم نترك الاوضاع عادية

لا نشوف بعيونهم ما اهانتنا

ونزود الكيه اللي بالحشا كيه

لكن فديتك لا نفضي ما تلفتنا

اخاف من دمعتي لتهل عفوية