أكثر من أحبك

هيفا إلا منّه عجز كلّ تعبير
عن وصف حبّي لك إلا قلت هيفا
تراه ماهو ضعف منّي وتقصير
لكن أحاسيسي من الهرج أوفى

أحبّك اكثر من أحبّك وبكثير
وبكثير هذي قدّ ما قلت  تكفى
يا الهرج عبرّ عنّها قال: وش غير
أحب هيفا  شيّ ينقال..؟ واقفى

والله لو قدّمت كلّ المعاذير
ما اظنّها تكفي.. ولا اظنّ يخفى
عليك ما فالقلب من زود تقدير
وصفه على وجهي من الكافي اكفى

يا جنّة الدنيا ويا احلى المقادير
انّ كان حبّي لك عن الغيد منفى
وقلبي سفينة والمرافي غنادير
مابي سوى هيفا على الأرض مرفا

ياللي إلا شفتك تزين التفاكير
والبال مهما كان مشغول يصفى
وقلبي من البهجة أحسّ انّه يطير
والفرحة تولّع والاحزان تطفا

الليلة بعرسك جميع العصافير
غنّت وهي دايم بهالوقت تغفى
تقول باذن الله بتصبح على خير
ما دمت يا فيصل عريسٍ لهيفا