جفاني

جفاني وابتعد ما خاف ربّه
وأنا اللي كنت أحسبه ما جفاني

تحملت وصبرت وقلت أربّه
يعود وما هقيت إنه نساني

أجيلك يا الغلا من غير سبّه
بلا موعد وأشوفك لو ثواني

دوا جرحي ودكتوره وطبّه
وحبك حلّ من خلف المحاني

مريض الحب تكفى لا تكبّه
من فراقك وطعناتك يعاني

هذا وانت الوحيد اللي يحبّه
وش اللي صار يا ترف الثماني

أحبّه... ثم أحبّه... ثم أحبّه
ولا أبدّل غلاه بشخص ثاني

وقلبي... كل دقّة له منبّه
تمره بالدقايق والثواني

حطبت ضلوعي وصدري مشبّه
أعاني آه من نارك أعاني

عن الشماتة تكفى الجرح خبّه
من الآهات ما جاني كفاني

يا دم عروق قلبي يا مصبّه
تراك اللي بقى لي من زماني

لعبت بقلب غيرك ما لعب به
ترفق بي... ترفق يا أناني