خطوة الخلخال

خطوة الخلخال انا فيها ذبيح
والقبر ما بين رجله والوطا 
الخطأ في مشيته انه يبيح
دم عشّاقه ليا منّه خطىٰ 
يتزلزل قلب و الخاطر يطيح 
ويتخلخل ضلع لو يمشى ببطىٰ 
في استدارة ظلّته جرمٍ صريح
ودّك انه يزيد إجرام وخطأ 

الهنوف اللي خطاويها تسيح
ساح مع وقع القدم أخذ وعطاء 
 يستريح اللي قبلها من مليح
ويستريح اللي بعدها مخلّطه 

كنّها الكوفي كذا فـ خط الفصيح
ايتعرّج عودها حاءٍ و طاء 
خطّ مايل كل تأويله وضيح 
وخطّ سايح بالغموض تنقّطه  
النسيم فـ كعبها يصير ريح
لا مشت ترمي أثرها ونلقطه 
ورب موسى والخضر ورب المسيح
ما بعد هاللخبطة من لخبطة

لا خطت بالصحّ بالمعنى الصحيح
اضمنت خلقٍ وراها مربّطَه 
ورّطت خطواتها وصف المديح 
المعاني ضايعه و متورّطه