سقط عمدًا

أصد هناك بعيوني
وألبسها العمى واغتاب
جروحك ذكرياتك
حالتي وش صار بغيابك

تغافلني على قلبي
وتدخل ما طرقت الباب
ولك عفيه على قلبك
إذا لي خنجرك جابك

عرفت تخون يا الوافي
وتلقى بالمدى أحباب
بغدرك كيف ما أدري
وانا اللي منك أدرى بك

أنا ما أشره على حظّي
لأن الحظ ما قد طاب
أنا بشره على قلبٍ
وثق فيك وتهقوى بك

أكيد إن الحكي ضايع
ولا ينفع معاك عتاب
وأكيد إنك خسرت الحب
واللي صار بأسبابك

أبدفن حزني بقلبي
واجاري غيبتك بغياب
وأكبر عقلي وأرحل
بلا ما أتلف أعصابك

تأكد لو بغيت اجرح
أبجرح قلبك وترتاب
تجيبك قسوتي عندي
مدام الطيب ما جابك

كثير أشياء تمنعني
وأول هذي الأسباب
بإنك شخص لو أجرح
شعورك أكسب إعجابك

أسولف لي عن أحزاني
وأفتح للألم أبواب
واقلّب همّي بقلبٍ
سقط عمداً من حسابك

تحير بحلقي العبره
وألبسها الدموع ثياب
بكاني كل شي
حتى غلاك ووحشة غيابك