أشرق

يا ملهم الكون وش معنى الامل والكفاح
ومجالد الصبر والراي القوي والصمود

بمصيحه والتمر والماء وخشم السلاح
ماثنيت لفظ الجلاله راية ابن سعود

سلم على اللي يحسب معزي العود راح
الدار في ضف عود وهيبة عيال عود

المملكة كل يوم تعيش قصة نجاح
ولا عليها من أصحاب النجاحات زود

طلع شبيهك ووردها عدود القراح
قالو تراهن عليها قال ترقا سنود

ما جابه الا قنوت أهل القلوب الصحاح
وبريرةٍ في الظلام ودعوةٍ في السجود

اشرق على الشرق الاوسط مثل نور الصباح
بالرؤية اللي بوادرها ترش الكبود

اهمها يجعل اخصامه تحب السماح
واقلها يمن الغزلان وسط النفود

اجتاح الارقام بعزوم الشباب اجتياح
هذا وهو ما تجاوز حروة اربع عقود

كنه يقول السياسة هيمنه واكتساح
يا المكتفي في فعول ملازمين اللحود

من الثقه في الهوية والغرور المباح
يدير امور الدول بالخيمه ام العمود