يا صديقي

يا صديقي كل حزن يفرح الشمات خبه
ودك ان اللي يعاني ما يقول انه يعاني

لو بسولف بتعبي واسمع اللي ما تعب به
كني اللي حط فوق الجرح الاول جرح ثاني

الاكيد ان الليال اوضح من اللي كنت احبه
والدموع اصدق من البسمات في يوم التهاني

لا تلوم اللي لقى الغربه ولا حن لمربه
وانت واقف من ورى الابواب واسوار المباني

يوم شفت ان الصداقه مصلحه والحب هبه
قلت ربي لا تذرني فردا وتحفظ اخواني

واعتزلت الناس كن بيني وبين الناس غبه
لا حبيب ولا صحيب ولا ضفاف ولا مواني

الحياه المستقره والامور المستتبه
والله انها تغني من أحلام وآمال وأماني

كنت امر بحزن لا يوصف وحال ما يشبه
جعل ربي ما يحط انسان غيري في مكاني