هلت العين دمعة

هلت العين دمعه وانتثر فوق خدي
يوم شفت الكتاب وشفت هاك العلامه

أزعج الصوت وأرجي عل خلي يردي
ياحياة المولع و ياحياة الندامه

ياحسين الدلال ويا مبيح بسدي
رد قلبي نهبته من محاني عظامه

اشهد اني عطيت والمقادير ضدي
دوك قلبي من اسبابك رمنه سهامه

عن جميع العذارى قلبي اليوم صدي
ما يريد المعنى كود ظبي العدامه

ودي اني قريب ٍ منك بالحيل ودي
عل عين ٍ تودك تهتني بالمنامه