خسرتك

خسرتك آه يا جمرة غيابك
ذكرتك رحت ادور في سنابك
فقدتك وافتقد حتى عتابك
سكنتك يا هوى الروح ومناها

جبرني شي ما يقدر عليه انسان
غصب عني بديت برحلة النسيان
واخبي سرك بصدري ورا الكتمان
وأقول اليوم أو بكره وبنساها

ولكن كيف انسى فيك أحلامي
وشوقي سيف يقطع كل أوهامي
وباقي طيف يشعل شمعة أيامي
سحابة صيف ليت تغيب ذكراها

حلا مرسوم يخفي علوم فالقصه
سما ونجوم فوق غيوم مرتصه
وعطر يدوم و ورد يعوم في نصه
وسهم هجوم يشغل قوم برضاها

من الحيره أقدم خطوتي مره
وارجعها على ما شفت واتشره
واتراجع اذا جاب الهوى عطره
وأقول الكون فوقه كون يفداها

تناسينا بوقت عتاب ونسينا
وعانينا وكان البعد يشقينا
وردينا ندور وصل يحيينا
واحيينا حكاية عمر نهواها

عسى ربي يديمك حب لي صافي
وعد أبقى على عهد الوفى وافي
واعيشك روح تشفي جروح وتعافي
سعادة عمر ما ننسى لياليها