تيلفوني

يا مرحبا يا مغلط في تلفوني 
مسموح مسموح والغلطات عفوية
صفرين تسعه وسته سته تموني 
 الرقم هذا فتح خط السعودية

ان قلت لبيك آمر هذي عيوني 
 فتحت ذا القلب والنيه على النيه
خليت لك في الحنايا بصمه ولوني 
 تفرق على لون دمي في مجاريه
خليت لك يا حبيبي بيت فرعوني 
يخربط الناس فالروحات والجيه
وخليت لك في عيوني ركض وضعوني 
 تزعل وتنزل تحت جفني وفوقيه

يا صاحبي وان نشدني طيفك شلوني 
 أقول طيب وطيفك فيه ماريه
مارية ٍ يوم تقبل تجذب لحوني 
وأجر له من لحون الشوق قافيه
بيحت يا قاصد الغلطات مكنوني 
 وأنا رومنسي أحب أهل الرومنسية
من دونك أعيش وانته تعيش من دوني 
 يا لين أوحيت صوتك لعنبو حيه

رجت زوايا خفوقي وأنشد ركوني 
وأنا ولد شيخ لي هيبه وشخصيه
الأرض أرضي وكون المرجله كوني 
 لكنه الحب والعاشق وطاريه
تكفون يا ناس بالله لا تلوموني
 الصدفه اللي بلا ميعاد جبريه
سموني العاشق المغرم وسموني 
الشاعر اللي قصايده ارتجاليه

قنابل ٍ من فكر راسي ومضموني 
 لكن قنابل غلا ما هي بذريه
وأغني البيت متراكب وموزوني 
 مبدع ومجنون و أفكاري خياليه
يا نجد ودي أغني بك على هوني 
حورية الأرض فوق الأرض نجدية
ويا مرحبا يا مغلط في تلفوني  
مسموح مسموح والغلطات عفويه