Kalimat Anghami
Picture of the item

لي صاحبً مملوح

بدر الشعيفاني و عبدالله بن زويبن  (٢٠٢١)

1.9K إستماع | 49 إعجاب
عسى الخيال اللي بروقه لها ضـوح 
‏يرخـي هماليـل الغشيـن القراحـي 

‏على قرى ساحوق من فوق وطلـوح
‏وريكات وذريـرة وهـاك المشاحـي 

‏لو كان مالي في مراعيـه مصلوح 
‏لا نيـب لامـوده ولا نـي متاحـي 

‏متريحٍ مـن بيـن جـدران وسطـوح
‏مبطي مـن الثنتيـن خـالٍ مراحـي

‏لي صاحبٍ مملوح مع نزل مسـروح 
‏يلعب بقلبـي لعبـة مضيـم ضاحـي 

‏وجدي عليها وجد من جـاه سامـوح
‏بنحـور قـومٍ يشهـرون السلاحـي 

‏عنده ثـلاث أذواد ماهـن بشرشـوح 
‏خلفاتهـن تسعيـن غيـر اللقـاحـي 

‏إلى صعق جنـه عرازيـل وطفـوح 
‏تركي على راس الغـزال اللواحـي

‏وجاهن عقيـدٍ زاحهـن كلهـن زوح 
‏وربعـه وراه يجمعـون الطيـاحـي 

‏و تخالفوا عند الطفـوح أم طلطـوح 
‏أم الخراطيـم الـطّـوال الشنـاحـي 

‏أن صد قام الغيـض يسقيـه ذرنـوح 
‏وإليا بغـى يفتكهـا ، مـن يناحـي ؟ 

‏وجاهم بدون شعور مع راس جردوح 
‏ورموه عطبيـن المرامـي وطاحـي

‏قد كنت عن روس المراقيب منصوح 
‏نصيحـةٍ مـا كلـلـت بالنجـاحـي 

‏قام الحمام ينـوح فـي قمـة الـدوح
‏غنـى وأنـا نايـم وفزيـت صاحـي 

‏أخذت لي غطـه وصحانـي النـوح 
‏وقعدت ألاحـي ليـن لاح الصباحـي 

‏و عديت من روس المراقيب لحلـوح 
‏لحلوح من روس المراقيـب فاحـي

‏مدملـجٍ ممسـوح جنبـه تقـل لـوح 
‏مثل الزجاج تمـوج عنـه الرياحـي 

‏عديت به سالـم وحولـت مجـروح
‏وأنا احسب انه سلوتي و انشراحـي 

‏حولت في جرحيـن مغلـق ومفتـوح 
‏وطعون شلفٍ مـن جميـع النواحـي 

‏وشميت لي ريحٍ خطيرٍ على الـروح 
‏ريحـان والريحـان سـمٍ ذحـاحـي

‏لاكـان كان اني تشافيـت مسـمـوح
‏ وإن مت جعلك من ذنوبـي مباحـي 

‏إلا أن حبك تقضيـة وقـت ومـزوح 
‏قلها على المكشوف وأطلق سراحـي

‏ما يشبع الجيعان مـن ريحـة الفـوح 
‏ولا يجزي الضميان شوف الضحاحـي

‏لازم تبين لي عن الحـب منضـوح 
‏ما بالخفـى خيـر البيـاح البياحـي 

‏أما أنتظر وإلا أنسحب عنـك وأروح 
‏وأنته تروح وجعل دربـك سماحـي 

‏و راسك من الشرهات بالسمن ممسوح
‏واللي طونّـه بيـض الأيـام راحـي..!‏